英足盃：力衝4冠王最緊要留放阿仙奴半細根得過_東方日報

文章内容

今晚英足盃第4圈焦點戰，阿仙奴主場硬撼韋根。雖然「兵工廠」實力高幾條街，但佢哋啱啱喺聯賽失分，仲有兼顧多條戰線，英足盃呢個階段未必咁上心，隨時派多名副選應戰，磨合較少初段或打折扣；韋根作客必定玩死守，1.5球半場細捧得過。（Now 651周一凌晨零時30分直播）文:法達斯維

阿仙奴今季劍指「4冠王」，除咗喺英超排第1及歐聯直入16強，早前更殺入英聯盃決賽，「食胡」機會遠較英足盃為高，何況佢哋上周中聯賽被賓福特逼和失分，依家只領先曼城4分，爭標形勢再度緊湊。主帥阿迪達權衡輕重，英足盃未必夫添出擊，況且德國國腳夏維斯又因傷缺陣，暴露出前線創造力不足問題，尤其對住密集防守，往往老鼠拉龜冇碇埋手，若然今場用多名冇乜點夾過嘅副選，攻力再打折扣，初段隨時咬唔入對手。

韋根擺「鐵桶」博偷雞
另邊廂，韋根只係英甲下游分子，自知實力不足，今場更要越級挑戰英超「1哥」，想喺呢個「爆冷溫床」博偷雞，一定先屯重兵防守，再伺機打突擊。值得一提嘅係阿仙奴主場面對龜縮球隊，初段進攻板斧唔多，佢哋近10仗主場，有8次半場開1球或以下，可見破鐵桶陣都要費一番工夫，半場細有逾2倍分頭，值得捧場。