英超：曼城食住上半大啱素_東方日報

文章内容

隨住阿仙奴周中被狼隊逼和，曼城重新進入爭標Mode，今場主場鬥紐卡素，肯定會極速數胡爭勝，不過「喜鵲」近排又上番力，尤其各項賽事作客3連勝，整隊信心返晒嚟，今場有望一開波就同「藍月亮」鬥攻，1.5球半場大值得捧場。

（Now 621及611周日凌晨4時直播）文:渡邊年

曼城鋒霸艾寧夏蘭特前仗對富咸受傷換走，上場英足盃鬥弱旅畀佢休息，今場又可以正選搏殺。「藍月亮」同紐卡素好有緣，今季已經係第5次碰頭。翻查以往交手紀錄，曼城過去21次頂級聯賽於主場鬥紐卡素，獲16勝5和不敗成績，而近12次入面，有11場「藍月亮」最少射入紐卡素2球，而近6場主場出擊全勝之餘，當中5場半場總入球開2球或以上。

喜鵲士氣高昂唔會縮
紐卡素今季首循環喺主場以2比1氣走曼城，如果今仗再下一城，就會係球隊自1983/84年後，首次一季雙殺「藍月亮」，球隊啱啱取得作客3連勝，話唔定真係有奇迹出現，「喜鵲」作客一樣唔會縮，近6場作客都有4場開出半場大，今場值得再追。