01
文章内容
今晚有卡星盃8強賽事，焦點戰係艾雷恩主場惡鬥艾沙哈尼亞。艾雷恩雖有射手阿歷山大米祖域缺陣，但崇尚進攻打法冇變，撞正有前冇後嘅艾沙哈尼亞，一場定生死實多波入，可以等睇入球騷。（周二晚11時15分開賽）文:法達斯維艾雷恩於聯賽畀榜首艾薩德甩開成條街，惟有向盃賽埋手，特別係艾薩德喺卡星盃已經出局，艾雷恩既然殺入8強，仲唔趁機博一博咩。艾雷恩射手阿歷山大米祖域由於獲塞爾維亞徵召打國際賽，今仗未能披甲，不過呢班波一向進攻大過天，而且仲有另一射手古德斯及前西班牙國腳洛迪高壓陣，其中古德斯喺今屆卡星盃4次披甲入咗7粒，入波有保證。
艾沙哈尼亞踢法有前冇後
另邊廂，艾沙哈尼亞依家聯賽排緊包尾，實力難與艾雷恩相提並論，特別係防守方面，尤其差勁，連續7仗有失波，不過佢哋冇玩龜縮死守，反而願意豁出去進攻，之前4仗都有波入，包括激戰卡塔爾FC僅輸3比4，攻力唔差。翻查紀錄，雙方近4次正面交鋒，全開3球或以上，預計大家今仗會繼續合演入球騷。
评论互动 (0)