沙特職：入局慢兼夾雙箭有傷希拉爾半場獻細_東方日報

文章内容

今晚沙特職直播戲碼，爭冠仲未絕望嘅希拉爾主場撲擊護級分子達馬克FC。希拉爾目前落後榜首艾納斯8分但少踢1場，力求全取3分向對方施壓。不過佢哋季尾演出不穩，兩大射手賓施馬同艾達沙尼都有傷在身，早段未必咬得入死守嘅達馬克FC，1.5球半場細值得捧場。（on.cc東網周三凌晨2時直播）文:工廠仔

希拉爾目前仍屬今季沙特職唯一不敗之師，但近12場聯賽只得6勝6和，和波太多成為落後艾納斯嘅主因。雖然季中獲賓施馬加盟，但希拉爾進攻失去昔日霸氣，面對密集防線往往冇碇埋手，近4場主場有3次半場開1球或以下，其中2場就因為入局太慢，搞到失分而回。

論實力希拉爾無疑勝過達馬克FC，但自從2個星期前喺亞冠盃出局，一直未有正式比賽，球員久疏戰陣，要啲時間撻番着，據報艾達沙尼因腳趾受傷上陣成疑，王牌賓施馬亦因身體問題未必落場，希拉爾火力勢必大打折扣，今場要迅速攻破客軍大門，並唔係咁易。

達馬克FC死守搶分護級
達馬克FC任務係搶分護級，幸運嘅係目前正處於今季狀態最好時間，近5場聯賽錄3勝1和1負，今場作客希拉爾只求1分，肯定屯重兵死守。翻查往績，雙方近7次碰頭，半場總入球全開1球或以下，咁好路數梗係再追半場細。