世界盃2026：揸住3分杜曹唔同你急英格蘭求穩細盤睇定食_星島日報

文章内容

世盃L組次輪大戰，首戰齊齊贏波嘅英格蘭同加納正面交鋒，兩隊依家都有3分喺手，今場踢法會偏向穩陣。英格蘭球員向來以體能強勁見稱，用逼搶同速度打擊對手，不過今場對加納都係非常體力化，「三獅兵團」喺世盃對親非洲球隊都唔會輕鬆，今場博3.5球入球細最划算。（Now 618及616周三凌晨4時直播）文:工廠仔

英格蘭上場4比2贏克羅地亞，早段防守表現麻麻，兩次領先都被追平，今場會加強防務堵塞漏洞，即使領先都會收住嚟踢。尤其英格蘭已有3分在手，大可以睇定嚟食，必要時靠一眾星級後備喺下半場再衝刺，今場好大機會拖慢節奏，以免哈利卡尼、迪格蘭賴斯等主力搏到殘。

「三獅兵團」嘅體能優勢向來係主要武器，但係對住同樣以超強體力見稱嘅非洲球隊，往往會陷於苦戰，領隊杜曹上任後首次輸波，就係上年6月輸畀塞內加爾。再睇番英格蘭近5次喺世盃面對非洲球隊，總入球全開3球或以下。

柏迪復出加納防線頂得住
加納整體實力唔算強，靠體力化踢法同對手周旋，上場憑後勁喺補時1比0絕殺巴拿馬，今場必定繼續鞏固防守。加納今場有防守中場湯馬士柏迪復出，中場掃蕩力獲得提升，有望頂住英格蘭攻勢，博3.5球入球細好路。