世界盃2026：夏蘭特奧迪加特蓄銳搏殺挪威夫添碎瓦話咁易_星島日報

文章内容

世盃32強賽事，E組次名科特迪瓦鬥I組次名挪威。科特迪瓦演出平穩，個別球星亦有出色個人能力，不過整體實力就唔及北歐勁旅挪威。挪威上場大輪換招至大敗，但主力養精蓄銳淘汰賽搏殺，今場猛虎出柙勝望濃，客勝要捧場。（Now 618及616周三凌晨1時直播）文:法達斯維

挪威被視為今屆其中一支神奇球隊，佢哋亦冇令球迷失望，頭2場分組賽先以4比1大炒伊拉克，再以3比2擊敗非洲勁旅塞內加爾，最後一輪對法國雖然慘敗1比4，但最大原因係挪威輪換10名正選，艾寧夏蘭特、馬田奧迪加特等核心人物全部先任後備，所以參考性唔大。喺呢場「讓晒車馬炮」嘅慘敗前，挪威已經連續10場正式國際賽贏波，實力極有保證，今場淘汰賽一眾主力「叉足電」回歸，狀態弗到漏嘅艾寧夏蘭特肯定大開殺戒，殺入16強唔成問題。

科特迪瓦單打獨鬥冇運行
科特迪瓦有恩迪奧文迪、阿密特迪亞路、尼高拉斯比比等高技術球員，不過踢法流於單打獨鬥，要擊破挪威嘅整體防守唔容易。科特迪瓦首仗驚險絕殺厄瓜多爾，上場贏庫拉索亦唔係好出色，射門次數仲少過對手，今場遇上挪威冇運行，一於撐客勝。